අහිංසක පුංචි මල් කැකුලු මුවගට සිනහවක් එක් කරලීමේ අරමුණින් මොරටුව විශ්ව විද්‍යාලයීය ලියෝ සමාජයේ අපි, කළුබෝවිල ලියෝ සමාජය හා එක්ව කොළඹ 4 ස්නේහා ළමා සංවර්ධන මධ්‍යස්ථානයේ සහ පානදුර ශාන්ත ජෝන් ළමා නිවාසයේ රැකවරණය ලබනා පොඩිත්තන් සොයා ගියෙමු. ලෝක ළමා දිනය යෙදී තිබෙන ඔක්තෝබර් මස පළමු වන දින ඔවුන්ගේ දවස සෙනෙහසින් වර්ණවත් කිරීමට අපට හැකි විය.
ස්නේහා ළමා සංවර්ධන මධ්‍යස්ථානයේ රැකවරණය ලබනා අවුරුදු 3-5 ත් අතර වයසේ පසුවන පුංචි සිඟිත්තන්ගේ නැටුම්, ගැයුම් වලින් සපිරි විවිධ ප්‍රසංගයක් නරඹා ඔවුන් සමඟ දවස පුරා විනෝද වීමටද ලියෝ සමාජයේ අපිට අවස්ථාව ලැබුණි. එදින රසවත් ආහාර පාන හා තෑගිබෝග ලබා දී පුංචි සිත් සතුටින් පිරවීමටද අපි කටයුතු කළෙමු. තවද ශාන්ත ජෝන් ළමා නිවාසයේ පොඩිත්තන් සමඟ ගීත ගයමින් ආදරණීය හැන්දෑවක් ගත කොට රසවත් තෑගිබෝග ලබා දීමද සිදු කෙරුණි. මේ සඳහා, CBL මංචි සමාගම අපට අනුග්‍රහය දැක්වීය.
ආදරණීය පොඩිත්තන්ට විනෝදයෙන් කාලය ගත කිරීමට අවස්ථාව ලබාදෙමින් ඔවුන්ව සතුටු කිර්‍රම අරමුණු කර ගනිමින් මෙම ව්‍යාපෘතිය සංවිධානය කෙරුණි. එමඟින් පුංචි මල් කැකුලුවන් සිඟිත්තන්ගේ ජීවිතයට සෙනෙහස පිරි මතක ගොන්නක් එක් කර දීමට ගත් උත්සාහය මල් ඵල ගැන්වී තිබෙනු දැකීම ලියෝ සමාජයේ අපට සතුටට කරුණකි.
No comments:
Post a Comment